طريقه تحضير كحك العيد البيتي زي المحلات

58

كتبت ‘ هند دبور

دخول عيد الفطر المبارك قرب، وديما بنستني العيد عشان الكحك اللذيذ، وأنهارده هنعمله فالبيت بطريقة سهلة وبسيطة وزي المحلات بضبط.

كحك المحلات

المقادير:

ربع كيلو سمنة ساقعه من التلاجة او بحرارة الغرفه.
معلقتين كبار سكر بودرة.
معلقه صغير ممسوحة خميرة فورية.
نص كوب ميه بحرارة الغرفه مدوبه فيها معلقتين صغيرين لبن بودرة، ممكن استبداله بميه عاديه او حليب عادى .
نص كيلو دقيق «لكل الأغراض»، عليه معلقه كبيرة سمسم ونص معلقه صغيرة بينكج بودر ورشه ملح ونقلبهم .
ربع معلقه ريحة موز او ريحة كحك أى نكهة تحبوها.

الطريقه:

نضرب السمنه الساقعه مع السكر بمضرب الكهربا لما تبيض و تهيش، «ممكن بدون مضرب بس تكون السمنة بحرارة الغرفه عشان تعرفو تضربو بإيديكم كويس ».

ننزل بالدقيق بالسمسم و البيكنج بودر ورشة الملح علي السمنة بالسكر و نبس كويس جداً ونعجن، لحد ما يمتص كل السمنة ننزل بنص كوب الحليب المذوب فيه الخميرة و نختبر قطعه نكورها و نضغط بالايد لو مشققتش من الحروف أو شقوقه خفيفه تبقي العجينة تمام.
لو عملت شقوق كبيرة يبقي محتاجة معلقتين تلاته حليب كمان .
نشتغل فيها ع طول بدون تخمير، نعمل كور قد بعضها قد الليمونة او قد حبه عين الجمل و نكون مجهزين الحشو.

الحشو:

عبارة عن ملبن عليه معلقه سمسم و عين جمل مفروم خشن او اى حاجه تحبوها ادهنو ايديكم سمنه بلدى و واعملوه كور صغيرة قد البندقه.

حشوة التمر:
تمر معجون بمعلقه سمنة عليها رشه قرفه و رشه حبهان بودرة «هيل» اختيارى ومعلقه سمسم ونكور صغير قد البندقه .

نحشي ونشكل ع طول و يدخل فرن سخن علي درجة حرارة 170 أو 180 للملبن المحشي.

و درجع حراره 160، للكحك المحشي الملبن السادة لمدة تلت ساعه نص ساعه إلا خمسه أو حسب ما يستوى.

ونطلعه من الفرن ونرش عليه السكر البودر، وبالهنا والشفا.

وكل عام وانتم بخير.




اترك تعليقاً